Moti i paqëndrueshëm do të vijojë të jetë prezent në të gjithë territorin e vendit gjatë ditëve në vijim, duke sjellë reshje shiu, erë të fortë dhe dëborë në zonat malore. Qytetarëve u këshillohet të mbajnë çadrat me vete, pasi reshjet do të jenë të herëpashershme gjatë gjithë javës së ardhshme.
Sipas parashikimeve të IGJEUM të raportuara në “Ora News” nga sinoptikania Anira Gjoni, prania e reshjeve të shiut do të ndihet edhe përgjatë ditës së shtunë, ndërsa do të ketë një pakësim të tyre ditën e dielë dhe paraditen e së hënës.
Megjithatë, shiu do të rikthehet sërish mbrëmjen e së hënës. Reshjet nuk pritet të kenë intensitet të lartë, përveç ditës së sotme ku lokalisht mund të jenë intensive dhe në formën e shtrëngatave. Nuk parashikohen problematika sa i përket përmbytjeve.
Përveç shiut, era do të jetë një tjetër element problematik gjatë ditës së sotme, e cila pritet të jetë mesatare deri e fortë. Kjo situatë mund të shkaktojë vështirësi në bregdet dhe në portet e Durrësit dhe Vlorës.
Sa i përket temperaturave, mëngjesi i së shtunës do të shënojë një rritje prej 2 gradë Celsius. Më konkretisht, në bregdet vlerat do të luhaten nga 11 deri në 16 gradë, në zonat e ulëta nga 9 deri në 15 gradë, ndërsa në zonat malore termometri do të shënojë nga 4 deri në 12 gradë Celsius.
Një lajm i mirë për adhuruesit e dëborës është se reshjet do të jenë në formën e borës në zonat veriore dhe lindore të vendit, në lartësitë mbi 1000 metra. Këto reshje dëbore pritet të jenë prezente gjatë ditës së sotme dhe të nesërme.
Duke parë në një perspektivë më afatmesme, muaji shkurt pritet të jetë më i thatë se janari, por sërish me prani të reshjeve të shiut, ndërsa temperaturat do të vijojnë të mbeten mbi mesataret shumëvjeçare.