Disa avionë ushtarakë amerikanë janë parë në bazën Lajes në Portugali , ndërsa Shtetet e Bashkuara shtojnë praninë e tyre në rajon për shkak të tensioneve në rritje me Iranin.
Shfaqja e këtyre avionëve pasoi një deklaratë të Donald Trump, i cili la të hapur mundësinë e sulmeve ndaj Iranit për të ushtruar presion ndaj tij që të pranonte kërkesat e Uashingtonit në lidhje me programin e tij bërthamor.
Presidenti i Portugalisë, Marcelo Rebelo da Silva, tha se qeveria portugeze po ndjek “nga afër dhe me vetëdije të plotë për faktet” përdorimin e bazës Lajes në Terceira, Azore, nga Shtetet e Bashkuara.
Baza mirëpriti 11 avionë furnizimi me karburant KC–46A Pegasus, 12 avionë luftarakë F– 16 Viper dhe një avion transporti C–17 Globemaster III, të aftë për të transportuar shpejt trupa dhe ngarkesa në të gjithë botën.
Pentagoni theksoi se Komanda Evropiane e Shteteve të Bashkuara pret rregullisht avionë dhe personel ushtarak amerikan sipas marrëveshjeve për përdorimin e bazave, aksesin dhe fluturimet me aleatët dhe partnerët.
Analistët ushtarakë e kanë lidhur këtë përdorim të bazës me Operacionin “Midnight Hammer” të Shteteve të Bashkuara , gjatë të cilit Lajes shërbeu si një stacion kritik furnizimi me karburant për avionët B-2 Spirit që nisën sulme ajrore mbi objektet bërthamore të Iranit qershorin e kaluar.
Donald Trump ka vendosur anije luftarake, avionë luftarakë dhe forca të tjera ushtarake në Lindjen e Mesme, ndërsa përpiqet të parandalojë Iranin nga ndërtimi i një bombe bërthamore. Raportet sugjerojnë se ushtria amerikane është gati të nisë sulme kundër Iranit që në fundjavën e ardhshme.
Uashingtoni ka vendosur mbi 120 avionë, duke përfshirë F-22 Raptor, F-16 dhe F-35A Lightning II, ndërsa aeroplanmbajtësja me motor bërthamor Gerald R. Ford lundroi në Mesdhe përmes Ngushticës së Gjibraltarit .
Anija Gerald R. Ford do t’i bashkohet aeroplanmbajtëses Abraham Lincoln , e cila përfshin avionë të padukshëm F–35C, F/A–18 Super Hornets dhe avionë të luftës elektronike. Për të mbështetur Marinën dhe Forcat Ajrore, Shtetet e Bashkuara kanë vendosur gjithashtu sisteme të përparuara kundërajrore Patriot dhe THAAD në rajon.