Marrëdhëniet mes Tiranës zyrtare dhe Berlinit duket se kanë hyrë në një fazë më të ftohtë, ndërsa në media po flitet për një distancim të Gjermanisë ndaj kryeministrit Edi Rama.
Por sipas ekspertit të sigurisë, Ilir Kulla, problemi nuk është personal, por lidhet drejtpërdrejt me përplasjen e mazhorancës me sistemin e drejtësisë dhe me mungesën e progresit real në procesin e integrimit europian.
Në një intervistë për emisionin “Të Pashoq”, Kulla theksoi se periudha kur jepeshin garanci për një anëtarësim të shpejtë në Bashkimi Evropian ka kaluar dhe tashmë partnerët ndërkombëtarë po kërkojnë rezultate konkrete.
Vizita e eurodeputetëve – sinjal politik?
Sipas Kullës, një tregues i qartë i kësaj klime ishte edhe vizita e fundit e eurodeputetëve gjermanë në Tiranë, të cilët nuk zhvilluan takim as me liderin e opozitës Sali Berisha.
Kjo, sipas tij, tregon se pakënaqësia nuk është e drejtuar ndaj një individi, por ndaj situatës së përgjithshme politike në Shqipëri.
“Koha e Merkelit ka kaluar”
Kulla kujtoi se raportet e afërta të së kaluarës nuk janë më të njëjtat, duke nënvizuar se Gjermania sot është në një kontekst tjetër politik dhe ndërkombëtar. Ai theksoi se zgjerimi i BE-së nuk është më prioritet me të njëjtin entuziazëm si më parë dhe klima politike në Berlin është bërë më e rezervuar.
Sipas tij, retorikat sulmuese ndaj Gjermanisë janë thjesht naivitet politik dhe nuk i shërbejnë interesit kombëtar.
A është moment reflektimi?
Eksperti shtoi se partnerët presin qeverisje konkrete dhe vendimmarrje, jo justifikime apo mohim të problemeve si korrupsioni dhe krimi.
Në fund, ai la të kuptohet se një reflektim serioz politik – madje edhe zgjedhje të parakohshme – mund të ishin një rrugëdalje për të rikthyer besimin ndërkombëtar.