Irani ka pretenduar se 560 ushtarë amerikanë janë vrarë ose plagosur si pasojë e sulmeve të fundit në Lindjen e Mesme, ndërsa Shtetet e Bashkuara e kanë hedhur poshtë këtë shifër, duke e cilësuar si propagandë lufte.
Sipas agjencisë iraniane INRA, Korpusi i Gardës Revolucionare Islamike (IRGC) njoftoi se më 1 mars ka lëshuar dy raketa balistike ndaj një baze ushtarake amerikane në Bahrein, ndërsa baza të tjera amerikane në rajon janë sulmuar në mënyrë të përsëritur. Sipas deklaratës iraniane, baza detare amerikane në Ali Al-Salem, Kuvajt, është “neutralizuar plotësisht”, ndërsa baza detare në Bahrein ka pësuar dëme të rënda nga sulmet me dronë.
SHBA: Vetëm 3 të vrarë, 5 të plagosur rëndë
Komanda Qendrore e SHBA-së (CENTCOM) ka kundërshtuar ashpër pretendimet iraniane, duke deklaruar se deri më tani janë konfirmuar vetëm tre ushtarë amerikanë të vrarë dhe pesë të plagosur rëndë.
Të dyja palët janë përfshirë në një “luftë narrativash” mbi shkallën reale të humbjeve. Irani ka pretenduar gjithashtu se ka goditur me katër raketa balistike aeroplanmbajtësen amerikane USS Abraham Lincoln, por ushtria amerikane ka deklaruar se “raketat iraniane nuk iu afruan asnjëherë objektivit”.
Akuzat për sulme ndaj objektivave civile
Ndërsa Irani ka deklaruar se po synon vetëm objektiva ushtarake amerikane në rajon, SHBA ka akuzuar Teheranin për sulme të drejtpërdrejta ndaj zonave civile.
Në një deklaratë zyrtare, Komanda Qendrore amerikane tha:
“Pretendimi i Iranit se po godet vetëm baza dhe asete amerikane është i rremë. Regjimi iranian po shënjestron në mënyrë aktive civilë dhe ka sulmuar më shumë se 12 zona.”
Sipas SHBA-së, ndër objektivat e goditura janë:
Aeroporti Ndërkombëtar i Dubait
Aeroporti Ndërkombëtar i Kuvajtit
Aeroporti Zayed
Aeroporti Ndërkombëtar i Erbilit në Irak
Hotel Fairmont Palm në Dubai
Hotel Burj Al Arab në Dubai
Hotel Crown Plaza në Bahrein
Porti i Dubait
Zona banimi në Beersheba, Izrael
Zona banimi në Tel Aviv, Izrael
Kulla Era View në Bahrein
Zona banimi në Katar
Pamjet ajrore të publikuara nga agjenci ndërkombëtare tregojnë re të zeza tymi mbi Dubai, pas sulmeve që Irani i ka cilësuar si kundërpërgjigje ndaj goditjeve paraprake të SHBA-së dhe Izraelit.
Përshkallëzim i rrezikshëm
Situata në rajon mbetet jashtëzakonisht e tensionuar, ndërsa përplasja mes Iranit dhe SHBA-së po zhvendoset edhe në sferën e informacionit, me deklarata kontradiktore mbi humbjet dhe objektivat e goditura.
Nuk ka ende një konfirmim të pavarur për shifrat e viktimave të raportuara nga të dyja palët.
Tronditet Amerika/ Irani vret qindra ushtarë të tyre, lufta në momentin më të nxehtë