Irani është goditur nga një tërmet me magnitudë 4.4 ballë, në një moment kur konflikti me Shtetet e Bashkuara dhe Izraelin ka hyrë në ditën e katërt.
Sipas Shërbimit Gjeologjik të Shteteve të Bashkuara (USGS), lëkundja sizmike ka goditur zonën e Gerashit në jug të Iranit dhe është regjistruar në një thellësi prej rreth 10 kilometrash. Deri në këto momente, autoritetet iraniane nuk kanë raportuar për persona të lënduar apo dëme materiale.
Ngjarja sizmike ndodhi në një klimë tensioni të lartë ushtarak në rajon. Në orët e para të mëngjesit, Irani ndërmori një sulm me dron ndaj ambasadës amerikane në Riad. Sipas Ministrisë Saudite të Mbrojtjes, dy dronë arritën të godasin objektivin, duke shkaktuar një zjarr të cilësuar si “të kufizuar”, ndërsa katër mjete të tjera ajrore pa pilot u interceptuan nga mbrojtja ajrore saudite përpara se të arrinin zonën diplomatike.
Pas sulmit, Shtetet e Bashkuara paralajmëruan reagim. Presidenti Donald Trump reagoi me tone të ashpra, duke deklaruar shkurtimisht: “Do ta mësoni së shpejti”, në një mesazh që u interpretua si paralajmërim për hakmarrje.
Ndërsa situata ushtarake mbetet e tensionuar, tërmeti ka shtuar shqetësimet në një rajon që tashmë ndodhet në prag përshkallëzimi. Autoritetet vijojnë monitorimin e zhvillimeve si në aspektin sizmik, ashtu edhe në atë ushtarak.