Deputetja e Partisë Socialiste, Elisa Spiropali, ka shoqëruar koleget e saj në një kafe pranë Kuvendit.
Në një kohë kur zhvillimet brenda kampit të majtë dhe debatet e brendshme politike kanë marrë vëmendje të shtuar, kjo dalje e përbashkët e deputetëve socialistë ka tërhequr interes edhe të mediave.
Një takim i tillë në një tjetër kohë nuk do të përbente ndonjë lajm të veçantë, megjithatë në kushtet aktuale politike dhe reagimeve publike të ish-ministres së Jashtme kundrejt kreut të Partisë Socialiste, Edi Ramës, çdo shfaqje e përbashkët e figurave kryesore të kësaj force politike “lexohet” me vëmendje të shtuar.
Siç shihet edhe në pamjet e mëposthme, Spiropali, Olta Xhaçka, Damian Gjiknuri, Bledi Çuçi si dhe deputetë të tjerë të mazhorancës janë larguar përkohësisht nga seanca plenare dhe janë drejtuar së bashku drejt një lokali në afërsi të Kuvendit, ku kanë konsumuar një kafe.
Kujtojmë se edhe ditë më parë, Elisa Spiropali dhe Damian Gjiknuri janë fotografuar së bashku në një prej bareve në Tiranë, “Omoi Essence”, një takim që gjithashtu ka ngjallur interes për shkak të zhvillimeve të fundit politike brenda së majtës.