Një 47-vjeçar nga Montana e SHBA-së, kaloi nëntë vite duke marrë kimioterapi për një diagnozë të gabuar të kancerit.
Anthony Olson u diagnostikua në vitin 2011 me Sindromën Mielodisplazike (MDS) nga Dr. Thomas C. Weiner, një ish-onkolog në spitalin St. Peter’s Health.
Në atë kohë, Olson ishte 33-vjeç dhe u paralajmërua nga mjeku se pa trajtim, nuk do të mbijetonte deri në fund të vitit. Megjithatë, një hetim i mëvonshëm zbuloi se Olson nuk kishte pasur kurrë MDS.
Dy biopsi të palcës kockore u kryen para diagnozës fillestare, por vetëm njëra tregoi shenja të MDS. Biopsia e dytë, e kryer pas dhjetë muajsh, rezultoi e pastër. Pavarësisht kësaj, Dr. Weiner e injoroi rezultatin dhe e këshilloi Olson-in të vazhdonte trajtimin, duke pretenduar se ishte një shenjë që trajtimi po funksiononte.
Vetëm në vitin 2016, kur Dr. Robert LaClair, një specialist për veshkat, zbuloi se Olson kishte një ‘tepricë hekuri’, nisi të zbulohej e vërteta. Kimioterapia jo vetëm që ishte e panevojshme, por kishte përkeqësuar aneminë e tij, një gjendje që Olson kishte përpara diagnozës së gabuar.
Në vitin 2019, Dr. LaClair arriti në përfundimin se Olson ishte diagnostikuar gabimisht dhe këmbënguli që ai të kërkonte një opinion të dytë. Një vit më vonë, LaClair e çoi çështjen në komitetin e rishikimit të spitalit dhe më pas, pasi u bë kryetar i komitetit, siguroi shkarkimin e Dr. Weiner.
St. Peter’s Health akuzoi publikisht Weiner për trajtime të panevojshme, përfshirë kimioterapinë, që kishin shkaktuar dëme te pacientët. Olson ndërpreu trajtimin në vitin 2021 dhe paditi spitalin një vit më vonë, duke arritur një marrëveshje ku mori një dëmshpërblim, shuma e të cilës nuk është bërë publike.
Ndërkohë, Dr. Weiner ka mohuar akuzat dhe ka paditur spitalin për pushim të padrejtë nga puna dhe shpifje. Padia e tij u hodh poshtë nga një gjykatës në Montana, por ai ka apeluar çështjen në Gjykatën e Lartë të shtetit, ku ende pritet vendimi.