Të paktën nëntë persona humbën jetën të dielën, kur një ndërtesë u shemb në Tripoli, në veri të Libanit, sipas një bilanci të ri të publikuar ndërsa kërkimet në rrënoja vazhdojnë.
Kjo është katastrofa e dytë e tillë brenda dy javësh në Tripoli, ku shumë prona ende konsiderohen me rrezik të lartë, pas një tërmeti të fuqishëm në rajon në shkurt të vitit 2023.
Ndërtesa e vjetër, ndodhej në lagjen e varfër të Bab al-Thabana, ku forcat e sigurisë evakuuan me nxitim banorët e pronave fqinje si masë paraprake, sipas agjencisë zyrtare libaneze të lajmeve ANI.
Shefi i mbrojtjes civile, Imad Haris, u tha gazetarëve se nëntë persona vdiqën në shembjen e djeshme, ndërsa gjashtë të tjerë u dërguan në spital.
Ndërtesa kishte dy seksione, secila me nga gjashtë apartamente, dhe rreth 22 persona besohet se kanë qenë brenda kur ajo u shemb, tha ai.
Në mes të natës, ekipet e shpëtimit vazhduan të punonin nëpër rrënoja, ndërsa ambulancat prisnin, të parkuara pak më larg, pa një gazetar i AFP-së. “Po e shpallim Tripolin qytet të prekur nga fatkeqësia” sepse shumë nga ndërtesat e tij mbeten të pasigurta, tha kryebashkiaku Abdel Hamid Karima.
Presidenti libanez Joseph Aoun urdhëroi mobilizimin e të gjitha shërbimeve të emergjencës dhe sigurimin e strehimit për banorët e ndërtesës së shembur dhe ata në ndërtesat fqinje që duhej të evakuoheshin, tha zyra e tij në një deklaratë.
Kryeministri Nawaf Salam foli në deklaratën e tij për një “katastrofë” që ai ia atribuoi “viteve të neglizhencës së akumuluar”.
Në fund të janarit, një ndërtesë tjetër u shemb në Tripoli, duke shkaktuar vdekje.
Libani është shtëpia e një numri ndërtesash të rrënuara. Shumë prona u ndërtuan ilegalisht, veçanërisht gjatë luftës civile (1975-1990), ndërsa disa pronarë shtuan kate në ndërtesa pa leje.
Në vitin 2024, organizata e të drejtave të njeriut Amnesty International vlerësoi se “mijëra njerëz” jetonin në ndërtesa të pasigurta në Tripoli më shumë se një vit pas tërmetit shkatërrues që goditi më shumë Turqinë dhe Sirinë.
Ajo vuri në dukje në atë kohë se kriza ekonomike e vazhdueshme po i privonte “banorët nga mjetet për të financuar riparimet” ose për t’u zhvendosur “në shtëpi të tjera” dhe u bëri thirrje autoriteteve “të vlerësojnë urgjentisht sigurinë e ndërtesave në të gjithë vendin”.