Një djalë 11-vjeçar nga Pennsylvania është paraqitur në gjykatë i prangosur dhe i shoqëruar nga rojet, pasi akuzohet për vrasjen e njerkut të tij në shtëpinë e familjes në zonën Duncannon, në veri të Harrisburgut. I mituri, Clayton Dietz, përballet me akuzën për vrasje dhe do të gjykohet si i rritur për incidentin që ndodhi më 13 janar, në ditëlindjen e tij të 11-të.
Sipas autoriteteve, ngjarja ndodhi pas një grindjeje për një konsolë videolojërash Nintendo, të cilën prindërit e kishin hequr dhe e kishin vendosur, së bashku me një revolver, në një kasafortë brenda shtëpisë. Hetuesit thonë se i mituri gjeti çelësat e kasafortës, e hapi atë dhe mori armën. Sipas dosjes gjyqësore, ai e mbushi revolen me plumba dhe u drejtua drejt dhomës së gjumit ku flinte njerku i tij 42-vjeçar, Douglas Dietz, duke e qëlluar në kokë ndërsa ishte në gjumë.
Policia mbërriti në banesë rreth orës 3:20 të mëngjesit pas një telefonate për të shtëna me armë zjarri. Oficerët e gjetën 42-vjeçarin me plagë fatale në kokë, ndërsa 11-vjeçari thuhet se po bërtiste. Sipas dokumenteve të gjykatës, ai bërtiste “Babi ka vdekur” dhe i tha nënës së tij: “Unë e vrava babin”. Gjatë marrjes në pyetje, kur u pyet se çfarë mendonte se do të ndodhte pasi qëlloi, ai deklaroi se ishte i zemëruar dhe “nuk mendonte për atë që do të ndodhte”.
Gruaja e viktimës dëshmoi se u zgjua nga një zhurmë e fortë dhe një erë që i kujtoi fishekzjarrët. Ajo tentoi ta zgjonte bashkëshortin, por ai nuk reagoi. Pak çaste më vonë, dëgjoi një tingull që fillimisht i ngjau me pika uji, përpara se të kuptonte se ishte gjak që përhapej nëpër çarçafë.
I mituri, i cili ishte birësuar në vitin 2018, u paraqit në Perry County Court of Common Pleas për seancën fillestare, duke shkaktuar reagime të forta mes të pranishmëve. Rasti ka ringjallur debatin në Shtetet e Bashkuara mbi aksesin e të miturve në armë zjarri dhe mbi çështjen nëse një fëmijë i kësaj moshe duhet të gjykohet si i rritur për një krim kaq të rëndë. Hetimet vijojnë, ndërsa gjykata pritet të vendosë mbi hapat e mëtejshëm proceduralë në një çështje që ka tronditur opinionin publik.