Rreth 500 pasagjerë u detyruan të kalonin natën të bllokuar brenda avionëve në Aeroportin e Mynihut, për shkak të reshjeve të dendura të dëborës që shkaktuan anulime dhe vonesa masive fluturimesh.
Sipas mediave gjermane, 123 pasagjerë të një fluturimi të Lufthansa nga Mynihu drejt Kopenhagenit, i planifikuar të nisej në orën 21:30 më 19 shkurt, mbetën në bord për rreth tetë orë. Pas njoftimeve të njëpasnjëshme për vonesa, fluturimi u anulua pak para mesnatës, por pasagjerët nuk mundën të zbrisnin menjëherë.
Raportohet se avioni ishte parkuar në një zonë të largët të pistës dhe mungonin autobusët për transportimin e udhëtarëve drejt terminalit. Për shkak të ndalimit të fluturimeve gjatë natës në Mynih, nga ora 00:00 deri në 05:00, aeroporti ishte i mbyllur dhe stafi nuk mund të organizonte zbritjen e pasagjerëve.
Të prekur nga situata ishin edhe udhëtarë të fluturimeve të tjera të Lufthansës, si dhe dy fluturime të Air Dolomiti drejt Austrisë dhe Italisë. Në total, rreth 500 persona kaluan orë të tëra të bllokuar në avionë, me furnizime minimale me ujë dhe pa batanije.
Pasagjerët arritën të zbresin vetëm në orët e para të mëngjesit, pasi mbërritën autobusët dhe shkallët lëvizëse. Lufthansa deklaroi se vonesat u shkaktuan nga mbylljet e përkohshme të pistave dhe procedurat e shkrirjes së akullit, duke kërkuar ndjesë për shqetësimin e shkaktuar