Një ngjarje tragjike ka tronditur komunitetin shqiptar të sportit, pasi një i afërm i futbollistit Valon Berisha ka humbur jetën në një aksident të rëndë rrugor në Austri.
Sipas raportimeve, aksidenti ka ndodhur në autostradën Westautobahn, ku mjeti me të cilin udhëtonte viktima ka dalë nga rruga dhe është përplasur me një barrierë anësore.
Mediat raportojnë se futbollisti shqiptar ndodhej në një automjet përpara dhe ka qenë dëshmitar i ngjarjes tragjike, duke ndaluar menjëherë për të dhënë ndihmën e parë së bashku me kalimtarë të tjerë. Pavarësisht ndërhyrjes së shpejtë të ekipeve të emergjencës, 38-vjeçari nuk ka mundur të mbijetojë.
Klubi i tij, FC Zurich, ka reaguar zyrtarisht duke shprehur ngushëllimet dhe mbështetjen për futbollistin në këtë moment të vështirë, ndërsa ka sqaruar se Berisha nuk ishte i përfshirë drejtpërdrejt në aksident, por ishte dëshmitar i tij.
Ngjarja ka shkaktuar reagime të shumta në rrjetet sociale dhe tek tifozët, ndërsa autoritetet austriake vijojnë hetimet për të zbardhur plotësisht rrethanat e aksidentit.