Një ngjarje e rëndë është regjistruar në Tiranë, ku një 60-vjeçar ka humbur jetën brenda ambienteve të një laboratori mjekësor në rrugën “Reshit Petrela”.
Sipas informacioneve paraprake, burri me inicialet H. M. kishte hyrë në laborator për të kryer disa analiza rutinë, por papritur është ndjerë keq ndërsa ishte në pritje dhe ka ndërruar jetë në vend.
Burime zyrtare bëjnë me dije se ngjarja ka ndodhur brenda ambienteve të laboratorit, emri i të cilit nuk është bërë publik nga autoritetet. Menjëherë pas konstatimit të situatës, është njoftuar policia dhe shërbimet përkatëse, të cilat kanë mbërritur në vendngjarje për të kryer veprimet e para hetimore.
Sipas njoftimit paraprak të policisë, dyshohet se shkak i vdekjes së 60-vjeçarit ka qenë një arrest kardiak.
Megjithatë, autoritetet theksojnë se rrethanat e plota të ngjarjes do të sqarohen pas kryerjes së të gjitha verifikimeve dhe ekzaminimeve mjeko-ligjore. Trupi i pajetë pritet t’i nënshtrohet procedurave përkatëse për të përcaktuar me saktësi shkakun e vdekjes.
“ Në një laborator mjekësor, në rrugën ‘Reshit Petrela’, shtetasi H. M., 60 vjeç, në momentin që ka hyrë në laborator në pritje për të bërë analizat, ka humbur jetën. Paraprakisht, dyshohet se humbja e jetës ka ardhur si pasojë e një arresti kardiak”, thuhet në njoftimin zyrtar.
Materialet procedurale i janë referuar Prokuroria e Tiranës, e cila do të vijojë me veprimet e mëtejshme për zbardhjen e plotë të kësaj ngjarjeje të rëndë.