Kryeministri Edi Rama ditën e sotme ka mbledhur qeverinë një ditë pas ndryshimeve surprizë në kabinet.
Ristrukturimi përfshiu disa dikastere kyçe, konkretisht Ministrinë për Evropën dhe Punët e Jashtme, Ministrinë e Drejtësisë, Ministrinë e Brendshme, Ministrinë për Marrëdhëniet me Parlamentin, si edhe Ministrinë e Infrastrukturës dhe atë të Mbrojtjes.
Mbledhja e qeverisë ishte parashikuar të zhvillohej dje, por u zhvendos për sot për shkak të mbledhjes së grupit të PS, në të cilën kryesocialisti Edi Rama bëri me dije shkarkimin e Belinda Ballukut nga posti i zv.kryeministres dhe ministres së Infrastrukturës, pasi edhe Gjykata Kushtetuese la në fuqi pezullimin e saj.
Balluku nuk iu bashkua mbledhjes së qeverisë, bashkë me dy ministrat e tjerë që Rama i largoi nga kabineti i tij, Pirro Vengun si ministër të Mbrojtjes dhe Elisa Spiropalin si ministre e Jashtme.
7 ndryshimet në Qeveri
-Albana Koçiu zv.kryeministre – zëvendëson Belinda Ballukun
-Enea Karakaçi ministër i Infrastrukturës dhe Energjitikës – zëvendëson Belinda Ballukun
-Besfort Lamallari ministër i Brendshëm – zëvendëson Albana Koçiun
-Toni Gogu ministër Drejtësie – zëvendëson Besfort Lamallarin
-Ferit Hoxha ministër i Jashtëm – zëvendëson Elisa Spiropalin
-Ermal Nufi ministër i Mbrojtjes – ikën Pirro Vengu
-Eriona Ismaili ministër për Marrëdhëniet me Parlamentin – zëvendëson Toni Gogun