Një operacion policor ka tërhequr vëmendjen në Podgoricë, ku forcat e rendit kanë rrethuar ndërtesën ku banon biznesmeni Ago Gjukanoviç, vëllai i ish-presidentit dhe ish-kryeministrit të Malit të Zi, Milo Đukanović.
Sipas raportimeve mediatike, policia ka zhvilluar kontrolle në ambientet e ndërtesës, ku ndodhet edhe një degë e një banke të njohur, e lidhur prej kohësh me interesat ekonomike të familjes. Deri tani nuk ka një komunikim të detajuar zyrtar mbi arsyet konkrete të operacionit.
Ngjarja ka ngjallur debat në opinionin publik, pasi familja Gjukanoviç ka qenë për dekada një nga figurat më të fuqishme në politikën dhe ekonominë e Malit të Zi. Çdo veprim i autoriteteve ndaj rrethit të tyre familjar shihet si një zhvillim me peshë politike.
Ky aksion vjen në një periudhë kur Mali i Zi po përpiqet të forcojë institucionet dhe sundimin e ligjit, ndërsa vendi ndodhet nën presionin e Bashkimit Europian për reforma në drejtësi dhe luftë kundër korrupsionit.
Deri në këto momente nuk raportohet për arrestime, ndërsa mbetet për t’u parë nëse operacioni do të pasohet nga procedura të mëtejshme ligjore apo hetime zyrtare.