Sulmi ushtarak që solli vrasjen e liderit të Iranit, Ali Kahmenei, mund të ketë pasoja edhe në botën e futbollit, për më tepër në një aktivitet siç është Botërori 2026.
Irani po mendon tërheqjen nga aktiviteti si pasojë e këtij sulmi në bashkëpunim mes Izraelit dhe SHBA, me këtë të fundit që është vendi organizator.
Përplasja në distancë mes Iranit dhe SHBA për aktivitetin kishte nisur që disa muaj më parë, kur amerikanët futën këtë vend në listën e atyre ku tifozët do të kishin vështirësi të udhëtonin për aktivitetin e verës.
E ndërsa FIFA po negocionte që të kishte disa lehtësime për tifozët, nisi tashmë ky sulm i cili praktikisht ka mbyllur çdo marrëdhënie diplomatike mes shteteve.
Presidenti i Federatës së Futbollit të Iranit, Mehdi Taj, bëri të ditur se tashmë po shqyrtohej ideja e tërheqjes nga Botërori. “Me atë që ka ndodhur dhe me sulmin nga SHBA, është e pamendueshme që të shihet me shpresë drejt Kupës së Botës. Por janë drejtuesit më të lartë të futbollit ata që do të vendosin si do të veprohet”, tha ai, duke ia kaluar topin FIFA-s.
Kjo e fundit, nëpërmjet zyrtarëve të lartë u shpreh se po monitoron situatën, por largimi i Iranit nga aktiviteti duket gjithnjë e më i mundshëm sidomos pasi ky i fundit reagoi për bombardimet duke kryer të tilla drejt shteteve fqinje ku ka baza ushtarake amerikane. /Panorama Sport/