Europa është përfshirë në një klimë të re tensioni pas deklaratave të ashpra që vijnë nga Irani në mes të përshkallëzimit të konfliktit në Lindjen e Mesme.
Sipas mediave ndërkombëtare, presidenti francez Emmanuel Macron ka zhvilluar një bisedë telefonike me kryeministren italiane Giorgia Meloni, ku në fokus ka qenë situata e sigurisë dhe zhvillimet e fundit pas sulmeve amerikano-izraelite ndaj Iranit.
Ndërkohë nga Teherani kanë ardhur paralajmërime të forta ndaj vendeve europiane. Autoritetet iraniane deklarojnë se nëse Europa vazhdon të qëndrojë e heshtur përballë asaj që Irani e quan shkelje të së drejtës ndërkombëtare nga Shtetet e Bashkuara dhe Izraeli, atëherë pasojat mund të prekin të gjitha vendet europiane.
“Nëse Europa hesht përballë këtij agresioni, atëherë të gjitha vendet do të paguajnë herët a vonë çmimin e këtij vendimi”, thuhet në deklaratën e bërë publike nga zyrtarë iranianë.
Këto deklarata kanë shtuar shqetësimin në kryeqytetet europiane, ndërsa liderët e BE-së po zhvillojnë konsultime të shumta diplomatike për të shmangur përhapjen e konfliktit përtej Lindjes së Mesme. Tensionet janë rritur ndjeshëm ditët e fundit, ndërsa sulmet dhe kundërsulmet mes palëve kanë rritur frikën për një përplasje më të gjerë ndërkombëtare.