Një incident i dhunshëm shpërtheu në bordin e një avioni të kompanisë Jet2 gjatë një fluturimi nga Turqia drejt Mançester, duke e detyruar pilotin të kryente një ulje emergjente në Bruksel pas një sherri mes pasagjerëve britanikë.
VIDEO KETU
Sipas raportimeve, një pasagjer u përpoq t’i rrëmbente telefonin një tjetri pas një debati për muzikën që po luhej me zë të lartë, çka shkaktoi kaos dhe frikë mes udhëtarëve – përfshirë fëmijë, të moshuar dhe persona me nevoja të veçanta. Dy personat e përfshirë kishin konsumuar alkool dhe, pak para incidentit, kishin bërë komente raciste ndaj pasagjerëve pranë tyre, si edhe ishin përplasur me ekuipazhin për cigaret.
Pasagjerët raportuan se panë gjak në sedilje dhe madje dhëmbë të rënë në dysheme gjatë përleshjes.
Policia e priti avionin në Bruksel dhe arrestoi dy burra sapo avioni u ul.
Piloti u tha pasagjerëve se në 30 vite karrierë kishte kryer vetëm disa ulje emergjente – dhe asnjëherë për një incident kaq brutal.
Një pasagjer lavdëroi ata që u ngritën kundër komenteve raciste, si edhe profesionalizmin dhe qetësinë e ekuipazhit të Jet2.
Në një deklaratë, Jet2 njoftoi se të dy burrat janë ndaluar përjetë nga fluturimet me kompaninë dhe se do të bëhet çdo përpjekje për të rikuperuar kostot e shkaktuara nga devijimi i fluturimit.